INFLUENZA
El l’avea dito quel dele previsiòn
che l’istà l’è ndà in don balon.
Nuole nere le sgola svelte
come vele de na barca pirata
e fora, e fora l’è borasca che cuna le case
che sbassa le piope che mucia le foie.
Eco!… eco che pioe, che pioe goze dal naso.
Mi taso, ma la gola se lagna,
ghè calcosa là in fondo che raspa,
doe prima ghera chieto e silenzio.
On colpeto de tosse, el dise tuto:
me son ciapà calcosa de bruto.
On po’ de mel e qualche limon,
el dise el sapiente dela television.
Mi, che vago drio, come el butin ala mama,
ma la gola la par na fiama…
e in facia, son rosso come on paiazo
e me trema le gambe e on fredo de giazo
me ciapa la schena e me sbrisola la pazienza;
meto el termometro: trent’oto e oto
Ma parché l’istà, l’à fato fagoto!..
e messo in valisa la bela stagion,
lasandome in braghe de tela e senza camisa.
Sfigà come son, l’è quasi mei che ciama el dotor,
parchè dopo la gola el podaria ciaparme la panza,
alora sì… che saria na bela ciavada.
Porca miseria, podea star zito, sento zà calcosa de drio,
corro nel cesso pi svelto che posso
ma!.. me la son, zà fata adosso.
Bissoli Mario
il contadino poeta