LA ME CASA
La me casa
l’è ne picola, ne granda
e quande vago drento
con rispeto la me braza.
L’ò tirada su come na butina,
però, al posto de le pape
ghe slongava on pochi de quarei
e na sfregolada con la smalta.
L’è vegnuda su, alta e ben vestia,
con on capel rosso in testa
e soto al sol la ride e l’è contenta,
tegnendo tra i brazi fiorelini
con i oseleti che ghe bala tut’intorno.
El tempo l’è on galantomo
e da tuti el pretende la giusta tassa.
Così, me son catà senza denti
e purtropo, anca la pelata
e, na gamba malandada.
Adesso, che no vago pi’ ala riscossa,
ve confesso e son sincero,
son spesso sentà ne la me caseta
che me adora e da conforto
e sta birbante la me fa l’oceto
come fusse el so moroseto.
Quando tira el vento e sento fredo
la me cuacia e la me scalda
e contandome le fole, de on tempo,
la me mete nel so leto e la me basa
come fusse on angioleto
e mi contento… m’indormenzo.
Mario Bissoli
il contadino poeta