L’APPUNTAMENTO DEL LUNEDÌ TRA POESIE DI CASA NOSTRA

SIGNOR, TE RINGRAZIO!

Stamatina, a le sète

me son alzà dal leto

co la testa balorda

e con tanti doloreti

da na parte e da l’altra

de la me vecia carcassa.

Sbosegando par el catàro,

criando con quei de casa,

brontolando tra de mi

son andà fora in strada

e me son guardà intorno.

Par aria stava passando

do bele tortorine

che, volando, le parea balar

lezére e graziose

come balarine de la Scala,

nel giardineto de casa

gh’era zà spanii

i primi bocoli de rosa

dai colori delicati,

dal fondo de la strada

stava vegnendo verso de mi

me fiola col so butin,

ch’el se preparava

a corarme incontro

con le so gambete

de pastafrola.

Me son desmentegà de tuto

e, guardando par aria, ò dito:

“Signor, Te ringrazio

par la bela giornada!”

Prof. Giuseppe Masini