ANIME UDE
On branco de motori
i s’à brocà tutte le fadighe.
S’à perso nel ricordo
chel mondo devoto
che, con la mesora
rancurava spighe
e on zercolo de man
consacrava a l’altar
de la famea.
Pie descalzi a schizar graspi
par benedir el miracolo del vin.
Cante che dai campi
se alzava in preghiera
par colmar de speranze
le catedrali del Ciel
e nastri de stele cadenti
i somenava
coriandoli de sorrisi.
Ader, deserte le campagne
e le cese abandonade.
Visi silenziosi e bisi
i adora altari de schei
drento a case impresonade
da muraglie de cemento.
Senza direzion
anime ude le se perde
urtade da venti noi.
Mario Bissoli
il contadino poeta