POESIA

PAGINA D’AMORE

Lo sò che la me Bassa l’è on calvario

e la me zente porta su le spale

el peso de le lune in calendario

e i segni de na tera ch’è stà male.

Lo sò che la fatiga l’è stà tanta

che la miseria on tenpo l’era granda,

però ghè lòghi ‘ncora che t’incanta

e pare che de sera i te dimanda

parcossa le contrade anco’ iè morte

e no ghè più el calore de na volta

tra tute le fameje de la corte…

Adesso tanti parla e pochi scolta,

fin el dialeto l’à subio la sorte

de i fati de la vita ormai stravolta.

          ——————————–

Par questo a go deciso de provare

a métare in poeisa sti me pensieri,

parché la tera e i òmeni de ieri

iè na pagina d’amore da salvare.

Lucia Beltrame Menini

Dal libro “A pié descalzi”