POESIA

POLENTA E BACALÀ

Vorìa mi qua savere
ci l’è l’autore vero,
quel bravo de mestiere
che l’à inventà el conziero
del bacalà e polenta
che in visibilio ’l manda…
e senpre lu el contenta
la panza ’nca se granda.
Vorìa farghe na targa,
on quadro, na poesìa,
na làpide gajarda,
calcossa in fantasia.
No credo ’l sia stà Dante,
e gnanca el gran Petrarca,
escludarìa el Ruzante
e pure ’l Can de l’Arca.
Par mi l’è stà na mama
che avéa finìo ’l so late:
se on fiolo el lo reclama
tute deventa mate!
Donca no ghè de mèjo
de sto magnare s-ceto:
za quasi me ingatejo
pensando al profumeto.

On fondo colmo raso
de bacalà ben fato:
co ’l naso me lo snaso,
co l’ocio leco ’l piato.
Sta densa paciarina
in teja a la fratona,
conzà a la vicentina…
ma quanto che l’è bona!
Roba da far le bave,
da pèrdare la testa.
Ghe ne vorìa na nave
par fare na gran festa.
Dunque in definitiva
el bacalà e polenta,
anca se malgualiva,
anca se l’è broenta,
l’è on paradiso in tera
par chi sa stare a tola:
bona matina e sera
parfin se l’è ’n po’ mola.
Donca ’sa ghè de mèjo
del bacalà inte ’l mondo?
Gnanca batemo zejo,
pociando fin tel fondo…

Lucia Beltrame Menini